未開動先，真係要先多謝不眠王子既邀請同埋酒店公關 B先生既安排，每次經過呢間沙嗲軒，見環境好似幾好咁，室外有啲浪漫感 (雖然而家天氣有啲熱，但係夜晚坐係呢度又唔算好熱，同埋相比起新加坡等地，香港已經算唔係太熱架啦！) ，是夜仲見到有外國人坐係度邊嘆海南雞飯，正！係啦！未講點解多謝添，因為...... 真係超正呀！
上一次閃閃都已經去過皇家太平洋酒店 ( Royal Pacific Hotel) 食過一次楊貴妃宴 ( ❤文章按此❤) 個次好食到，我第二次自費去再食 (女生對滋補養顏既食物都不能抗拒) ，今次食過沙嗲軒，已經好快咁約同事下星期再去食，因為實在實在太太太正了！
試菜當晚閃閃準時放到工，所以一放工就搭船仔過尖沙咀，Royal Pacific 位於中港城，對閃閃黎講搭船仔再經海港城行過去好方便 (冇咁熱呀....) ！去到王子已經係度，當晚閃閃同點點、Meling、Alice、愛姐同埋 Little Ka 一齊過左晚好開心既晚上！
一去到先點左個椰青先，因為閃閃知要食辣，但因為閃閃已經唔太食得辣，飲冰凍既野飲會仲辣，飲椰青就可以中和個辣度！！而且椰青既既肉都好好味！
然後首先黎既係家鄉福建薄餅 (HKD $48)
閃閃第一次食咋，用薄皮加生菜再包住數唔到咁多既餡，混埋甜酸醬，閃閃仲見到有蝦添唷，少少酸同少少辣，好惹味！
雜錦沙嗲 (豬、牛或雞半打 HKD $75)
唔記得 Close up 個沙嗲添，個沙嗲勁香呀，有花生醬同花生粒，所以令個沙嗲更加香，點串燒真係勁正呀！而係串燒當中，閃閃最愛吃係雞，其次係豬，然後係牛，其實三款都好好味，不過雞肉比較滑，個人黎講最愛，其餘的都燒得香口得黎入面都算多汁，不錯不錯！
肉骨茶 (HKD $60)
閃閃未去過新加坡，冇食過當地既肉骨茶，係香港有食過，但覺得冇乜特別，呢度既肉骨茶有藥材香但又唔太嗆！閃閃其實好鐘意食藥材味既湯品，但個肉骨茶閃閃成個飲晒，一飲完，本來覺得冷氣好凍都即刻覺得個人血回升不少，暖笠笠好多！
配料既黑豉油，閃閃以為會好咸，所以只係點左少少，原來係甜甜地，個肉排點佢原來好好味，個黑豉油黑到發光咁，據說黑豉油係新加坡入口的唷~
星洲炒蘿蔔糕 (HKD $75)
呢個炒蘿蔔糕加左唔同既配料，有蛋有蝦米等等，又係辣辣地，好惹味，以炒蘿蔔糕來說，呢個係我食過最好味的，一來蘿蔔糕唔似出面個啲好似得粉咁 (蘿蔔糕係自家制架！)，蘿蔔味好重，應該好足料去整呢！
福建蝦湯麵 (HKD $72)
蝦湯麵閃閃唔係第一次食，但係但係，呢個真係勁勁勁正！個蝦唔細隻，片到一片片，但蝦味重同埋好爽，呢個未係重點，重點係個湯底，呢個湯底唔似出面個啲用小小蝦再加上湯，個湯底唔夠鮮蝦味唔重得個咸字！但呢個，飲一口已經有好好好濃郁既蝦味，仲要係好鮮味個種，對於好好好好好好好鐘意食蝦既閃閃黎講，真係要比無限個ⓛⓘⓚⓔ~~~~~~
好味到要同又係好鐘意食蝦既同事講，已經約好過兩日去食，真係勁好味！大家去食沙嗲軒既名物海南雞飯外，記得記得食呢個福建蝦湯麵呢！
沙嗲軒海南雞飯 (HKD$150 半隻)
沙嗲軒海南雞飯 (HKD$88 例)
其實一個人食一個例已經好夠，多人就可以叫半隻 Share 黎食，個油飯真係水準之上，唔會又油膩感但又有雞油既香，粒粒分明，好味道，再配點上黑豉油既雞，今晚個雞肥左少少，但係雞肉好滑，好好味！席間愛姐 Post 左上微博，有人回應話沙嗲軒既海南雞飯好味過文華！真係好堅呢，閃閃其實好鐘意食海南雞飯，試過去海南少爺食 ( ❤文章按此❤)，真係唔掂，以價錢來說，呢度絕對好味過海南少爺好多好多，實在唔明白點解啲人仲要去海南少爺排隊食又貴又唔抵食，如果只係食海南雞飯，黎沙嗲軒食絕對好味又坐得舒服！
焗胡椒蟹 (HKD$280)
其實閃閃第一次食胡椒蟹，勁香既胡椒味，好好好入味，據 Meling 講係新加坡食胡椒蟹係好貴的，呢度只係$280蚊就有咁大隻，勁抵食！
蟹鉗可能有個勁厚既殼保護住，唔會太辣，但蟹爪就不得了，辣到呢....閃閃係咁飲椰青，鐘意食辣既真係不能錯過，因為酒店貨，呢蟹唔會細隻，大大隻既菲律賓肉蟹，啖啖肉，閃閃推介！
星洲辣椒蝦 (HKD$260)
本身閃閃真係好鐘意食蝦，但本身唔太鐘意呢種汁，不過佢係大大隻虎蝦，一碟有成八隻，啲蝦又爽又好味！
古月香茅大蝦
見到冇價錢，因為呢個係唔 On Menu 既菜式，係大廚特別整比我地食，少少辣勁香香茅味！呢個真係又係好正！可惜唔係 Menu 既菜式，希望第日佢地會加入呢個古月香茅大蝦入菜單度啦！
星洲紅豆冰 (HKD $55)
呢個閃閃冇食，但係呢個賣相都已經覺得好味，哈！好多料呢！
左邊係涼粉雪糕 (HKD $42)，右邊係椰香黑糯米 (HKD $42)
因為已經太飽了，所以我同點點 Share 一個椰香黑糯米，其實真係太飽了，不過呢個黑糯米真係做得不錯，下次我要試下涼粉雪糕先得！
其實係香港真係好幸福，可以食都唔同既菜式，好似今晚咁，食到正宗既星馬菜式， Meling 仲話比起佢係新加坡食更好味！而且以酒店來說，呢個價錢真係超值，兩三個人的話，閃閃推介食沙嗲軒海南雞飯、福建蝦湯麵同焗胡椒蟹再加個甜品，就真係飽到抱住個肚走！一大班人就可以每樣都叫啲，一樣食得好飽唷！
沙嗲軒 (SATAY INN) 共有分店在尖沙咀及屯門，講方便當然係尖沙咀呢間啦！當晚我地食到成 11 點半添唷！
皇家太平洋酒店
九龍尖沙咀廣東道33號中港城平台一座三號店
(852) 2738 2368
另外係屯門黃金海岸
香港黃金海岸酒店
香港黃金海岸青山公路一號
(852) 2452 8822
星期一至星期日 12:00 noon - 11:00 pm
大家可以入埋皇家太平洋既 Facebook Page，佢地不時都會更新消息 (就係每晚做到好夜既 B先生，辛苦晒當晚招呼到我地走為止呢)，記得去左手邊睇下有咩優惠COUPON呢，好似今個月就有呢個：
(原圖去返FB DOWNLOAD 唷！有八折唷~~~~~~~)
嘻嘻，記得都加入埋閃閃個PAGE唷！
請給個 "LIKE" 加入唷，我會常在 FACEBOOK 更新試用動向唷！
沒有留言:
發佈留言