BE x Melvita 有機玫瑰系列

月初的時候，我已經預告左 BE x Melvita 有機玫瑰系列 既試用，真係超唔好意思，隔左咁耐先寫，因為家中電腦正式退役，買左新電腦先可以舒舒服服咁打試用文呢！

最近試用活動好活躍，但係因為生日月既關係 (咪即係等於破財月囉.....)，自己都買左啲禮物送比自己 (其實係趁用晒要添置)，但因為仲有好幾樣試用品報告要交了！所以遲少少囉！

講返今次既試用先，其實我已經用左唔只十日架，基本上呢排日日都有用！不過我主要只係用其中一款產品，因為 BA 囉試用品比我既時候，已經因應我既皮膚作出左使用既指引，佢建議我暫時唔好用玫瑰果油 (Rose Hip Oil)住，因為我皮膚起粒粒呢，怕我用左會引起反效果，真係多謝 BA既細心呢！

玫瑰果油 (Rose Hip Oil)我都會用，但要過一排先用得，我會再同大家報告呢！今次集中講下玫瑰蜜霜 (Rose Nectar Day Cream)吧！

細個既時候，我唔鐘意玫瑰花的，總係覺得佢太娘了，但大個左反而欣賞玫瑰花既美，而且因為接觸護膚品多左，有好多產品都用上玫瑰花，因為佢有保濕既作用，但打正係有機產品我接觸得比較少，今次試用 Melvita 既有機系列，認識 ECOCERT 認證機構既資料 (相關資料) ，用得好放心呢！

官方資料：
質地幼嫩，適合幼嫩肌膚使用，玫瑰蜜霜蘊含多種玫瑰的活躍成份：具修護作用的摩洛哥玫瑰、具舒緩作用的伊朗玫瑰花水、具更新作用的智利玫瑰果油及具活化作用的玫瑰種子乳液，其中大馬士革玫瑰更為此產品添上獨特的香氣。
玫瑰蜜霜質地易被吸收，有效為幼嫩肌膚增添亮澤。

純白色的霜狀質地，少少杰，但搽上面又好滑好易推！


產品包裝設計平實，最驚喜係個咀，BA話係每一次咁既時候先會打開，平時係冇洞的，咁既設計係因為想產品儲存係密封既樽內，每次按出既CREAM 都係新鮮冇比空氣既細菌感染！有出冇入！雖然我覺得未必做到100%有出冇入，但比起平時我地用既產品設計的確係乾淨好多！讚！


水份測試，由上至下，分別係未搽產品前，中間係搽左之後既五分鐘，最下面係搽左之後既十分鐘，可以睇到佢既保水能力同埋保持水份既能力都好好！


另外玫瑰果油 (Rose Hip Oil)既質地，一般精油狀，味道對我黎講就唔係太討好了，可能因為佢係玫瑰果而唔係玫瑰花既香味！搽落手都算快吸收，唔會好油！

官方資料：
經臨床測試証明對滋潤乾燥皮膚特別有效,蘊含豐富的脂肪酸，有助提升皮膚的再生功能，對修護日曬後的皮膚尤其有幫助，另外，玫瑰果油亦有維持皮膚的緊緻及彈性的作用，對預防及撫平因為懷孕引起的妊娠紋或體重變化造成的橙皮紋具明顯功效，同時亦有效減少皮膚的色素，預防黑斑及雀斑形成。

遲啲皮膚冇乜粒粒既時候，我會試用呢個果油！

講返今次試用，玫瑰蜜霜 (Rose Nectar Day Cream) 我冇留意到佢係 Day Cream，夜晚都用埋佢，後來先發現係日霜黎，不過夜晚用又冇乜問題喎，佢連敏感皮膚都用得，我用得好放心，用左一段時間，我覺得皮膚好滑，而且淡淡既玫瑰味好香唷，入面有好幾種唔同既玫瑰花成份添！

不過夏天用佢總係覺得有啲厚，但搽落又冇乜野喎，可能雖然話係夏天，但係呢... 成日都身處冷氣房，係咁抽乾水份，又成日係冷氣同戶外咁一冷一熱，皮膚要多啲滋潤同保水係必需既呢！

多謝 Beauty Exchange x Melvita 今次提供既試用呢，我仲有興趣買埋佢枝玫瑰花水添唷！