早前寫了一篇關於 30歲 的文章，多謝大家既留言鼓勵，其實我唔算係非常正面思想的人，但近年的確想法正面多了，雖然過去發生好多不開心的事，甚至否定了自己，但又可能因為這樣，現在想法的確和以往有所不同，感謝人生中出現過改變我的人，我知道我的人生會因為改變而改變，當然是變得更好唷！
今年首餐生日飯，因為人數多，所以選了金田日式放題，這間比我上年選的松屋好好多，起碼魚生不是細細粒咁，食物質素也不錯，而且今次訂了房，較光猛，不過次次上食物都在門口那邊，要夾野食好遠，最後原來妹妹食了很少野食，返到屋企要再食野，我沒有留意到呢.... 都是我照顧不力吧！(我掛住傾計添, hahahha)
第二餐是公司同事們和食的，揀左金羅寶韓國料理，其實我同同事仔成日都去食，今次仲同同事仔share 野食，叫左個海鮮麵，好鮮既蝦味，正！另外仲有我最愛既牛肋骨，必吃！
第三餐係最頑皮既朋友請吃既生日飯，但係我自己等位囉....... 等左成個鐘先有位喎，係邊間，就係係 Langham Place既近又吉列黑豚專賣店，我企係旁邊等位，個侍應都可以細聲到我聽唔到佢叫我既 No.！好無奈，因為佢次次叫 No.我都已經好留心聽......到我地入座，首先每人會有碗仔自己磨既芝麻，未食飯已經有野玩，自己即磨既芝麻會比預先磨好既芝麻更香！再加醬汁要黎配豬扒，好美味！
我叫既套餐係自由配搭，可以揀自己想食既食材配搭！仲有一大堆可以添食既椰菜絲，好好味，豬扒唔算係好滑，但炸得剛剛好，不會太乾！(但都係覺得媽媽煮既豬扒味好多，我都要學煮先得！嘻嘻)
朋友仔點這個就幾得意，夾心豬扒，揀左芝士夾心！幾得意又幾好味唷，下次如果再食要食呢個先得！
呢個唔係頑皮個個朋友仔，係另一朋友仔阿柑，影返張相留念先，今年佢已經同我一齊食左兩餐生日飯架啦！啜啜！
多謝頑皮朋友仔同阿柑唷！嘻嘻！
今年正日生日係新曆舊曆一齊，唔知點解喎，唔係每19年一次既咩？我未到38歲喎，哈哈，正日生日另一朋友仔約左我食魚，我好喜歡吃魚的唷，好難得朋友仔記得我生日又記得我喜歡吃魚，位於油麻地的叫巴蜀烤全魚，我聽過但未去食過，屬於川菜既烤全魚，由朋友仔發板，揀左剁椒烤全魚，成條魚上，好大條唷，揀剁椒應該係因為我係食得太辣，但剁椒係咩黎呢？我又唔係好知喎，烤好魚後用魚湯滾住，再加上配料，好好味，食晒成條魚！我應該會再約朋友去食過呢！金菇好少添，因為佢吸左啲味好好味，如果多啲金菇多啲就好啦！
呢個烤全魚有特色唷，多謝朋友仔！
今年生日無特別搞活動，但我本來是一個好易開心同滿足的人，所以今年覺得好開心，多謝咁多位朋友仔！啜啜~
對了，今年很多願望，希望會一一實現吧！學Little Ka ，大家借啲運比我，希望我想讀既課程會收我唷！！！！
沒有留言:
發佈留言